Hebrai 10:19-22 - ”Chutichuan, unaute u, kawng min ruat sak, kawng thar leh nungah chuan, puanzar chu (chu chu a taksa tihna a ni) kal tlangin, Isua thisen avang chuan Hmun Thianghlimah khan luh kan huam avang leh, Pathian chhungte chungah Puithiam ropui tak kan neih avangin, kan thinlunga chhia leh tha hriatna tha lo chu theh fai saka awma, kan taksa pawh tui fima buala awmin, rinna famkim neia thinlung tak zet puin I hnaih ang u.”Isua Thisen Avanga Luh Theihna…
Nitinin Lalpa awmnaa luh theihna Isua thisen avangin kan nei a. Rom sipai hoten Jerusalem Temple an tihchhiat hnu daih ah Hebrai lehkhabu hi ziak a nih avangin “Hmun Thianghlim ber” hi Thuthlung Hlui huna hmun bik an sawi ang kha a ni tawh lo. Helai thu hian Chatuan Hmun Thianghlim ber, Hmun Thianghlim tak vana ‘lalthutthleng Lalpa thutna hmun’ a sawi a ni. Lalpa chu hmun tina awm “omnipresent” a nih avangin khawihmunah pawh awm ila Pathian awmnaah kan awm reng a ni (Sam 139:5-10 en rawh). Amah nena kan inpawl emaw a awmnaa kan luh hun hunah, Pathian awmna hmun nena inzawm kan nih hunah Hmun Thianghlim berah chuan kan lut a ni. Chu hun chu min Siamtu leh Chhandamtu nen a inpawhna hun danglam tak a ni.
Biakina kan inkhawm lai leh mahni chauha tawngtaina kan neia Pathian kan fak laiin Lalpa awmnaah kan lo lut thei a. Engtin nge kan luh mai theih? Isua thisen avangin kan lut thei a ni. “Isua thisen avang chuan Hmun Thianghlimah khan luh kan huam avang” a ni. Pathian chu engkimah Lal Ropui ber a ni a, lalte Lal, hotute Hotu a ni. Kan thu nilovin, Ama phalna ang zelin A Lalthutthleng kan thleng thei chauh a ni.
Lalpa lalthutthleng hi kan phu reng vanga lut thei kan ni lo. Mi sual vek kan nih thu hi Bibleah hian chiang takin kan hmu (Rom 3:23); Pathian duhsakna chang turin tumah hian thatna kan nei miah lo a, khawngaihna avang chauhvin Pathianin duhsakna min hlan zawk a ni. Heihi Bible-a “khawngaihna” awmzia chu a ni. Sakhawmia inchhal mi a leh chapote chauhvin Pathianin antana bat nei leh Pathianin a khawngaih bikah an inngai thin. Isua thisen avang chauhvin Pathian khawngaihna kan dawng a, Ama awmna hmunah kan lut thei a ni.
Tunlai Kristian tamtakte chuan Pathian biak inkhawm hi khawvel huap tih dan zulin an huaihawt duh ta hle a. Christian rock bands thei taktakten concert-naa Pathian fakna hla rimawi chitum tumte nena an sak thin hian mipui a hip hneh tawh hle mai. An fakna hla thenkhatte chu thiam taka phuah an niin zainaah pawh an titha hlawm thin hle mai. Mahse, Kristian tamtakin Pathian an fak hunah hian Isua thisen hlutna hi a tel meuh lo. Chu ai chuan, Pathian fak leh zai turin mipui an inkhawm a, an hun hlu tak takte kalsana inkhawm an nih vang ngawtin Pathian chu chawimawi hleah an inngai a ni. Pathian an ngaihtuahna leh thil tha lam tiah an inngaih avangin Pathianin hliahkhuh tawh em emah an inngai bawk a ni. Kan thiltum that vang emaw, kan taksa phur vang emaw, Atana hun kan pek vang emaw ngawta ‘Hmun Thianghlim Ber’ luh theihna kan dawng a ni lo. Isua thisen avang chauhvin kan dawng a ni.
Thuthlung Hlui huna inthawina an hlan kha Pathian chawimawia inkhawmna kan nei ang hi a ni a, Amah chu fak tlak a nih avangin Pathian chu chawimawina an hlan a ni. Hemi inthawina hlan intanna hmasa ber mihring chanchina kan hmuh hmasak ber chu Adama leh Evi fate Kaina leh Abel ate chanchinah khan a ni. Pathian chuan Abela beram hlan chu a pawm a, mahse Kaina-in a thlai hlan erawh a pawm lo (Gen. 4:4-5). A chhan nibera lang chu Abela khan Pathian thiltum a hria a, Kainaa erawh chuan a hre velo a ni. Abela chuan, Adama leh Evi hnena Lalpa inpuanna thlir letin, Kros-a Isua thihna rinnaa hriatchiannain a hmachhawn zel a lo ni. “Rinnain Abela chuan Kaina ai chuan inthawina tha zawk Pathian hnenah a hlan a, chu mi avang chuan mi fel a ni tih hriattirna a hlawh a, Pathianin a thilpekte kawngah chuan thu a hriattir a; tin, chu mi rinna avang chuan ani chuan thi tawh hnuin thu a la sawi ta fo a ni.” (Heb. 11:4). Kaina thil hlan kha inthawina chu a ni ngei a, mahse apawimawh ber thisen a tel lo tlat a ni. A thil hlan kha Pathianin a nemngheh nilo mihring siam chawp sakhuana leh rawngbawlnana thiltum diklo te entirna a lo ni daih zawk a ni. Isua thisen avang chauhvin Pathian hi kan hnaih thei a ni. Keimahni kalhmang hian awmzia a neilo. Bible pumpui kan enin Pathian mite chuan Ama hnena an kal apiangin inthawina an hlan thin. Heng zawng zawng hian Isua thisen an lo tinzawn vek niin, Pathian hnena inthawina thil hlan zawng zawng a khum vek bawk a ni.
Chuvangin, Pathian kan fak dawn apiangin, Lalpa nena kan inpawl theihnan, kan nunah Isua thisen dilin hun reilote kan tawngtai ziah thin a. A huhova fakna (biakin inkhawm, tawngtai inkhawm, etc.) kan nei dawn pawhin tawngtaina emaw fakna hla emaw kan sak hmain, Isua thisen dilin thuhnuairawlh taka thingthiin a rualin kan tawngtai phawt thin. Tunlai hian kan uar tawhlo viau naa Thlarau Thianghlim chuan thuhnuairawlh tak leh zah tak chunga thingthi a hun hmang turin min duh a ni. Lalpa awmnaa kan lut a, a lalthutthleng hmaa kan kal a, khawvel sualna ata silfai thar leh zelna kan neih hun hi hun hlu ber a ni. Pathian nena rilru din taka inpawlna kan neih theih nan khawvel thil laka kan fihlim a pawimawh a, chuchu Isua thisen dilnain kan tan thin a ni. Heihi ringlote zinga kan awm lai (bus-ah emaw, kan hnathawhnaah emaw) a nih pawhin ngawi rengin, kan thinlungin kan dil thei a ni. Thu danga sawi chuan ringtute nena kan tawngtai ho a nih chuan ring takin, zah tak leh thuhnuairawlh tak chungin kan dil thei bawk a ni.
