A THAR NGE NGE A THA

– Pastor J. Vanlalhnuna

“Chutichuan unaute u, Pathian khawngaihna avang hian, inthawina nung leh thianghlim leh Pathian lawm tlak ni turin in taksa chu inhlanah ka ngen a che u; chu chu in rawngbawlna awm reng a ni.” (Rom 12:1)

“Thil tha ti atan Krista Isuaah chuan siama awmin ama kut chhuak kan ni si a; chu thil tha tih chu kan awmna turin Pathianin a buatsaih lawk a ni.” (Ephesi 2:10)

         Zirlai naupangte sikul lut tanin nitin zirtirtu hnen atangin zirlaibu keu leh chhiarin thil thar an zir thin a. An hriat ngai loh an zir a, an thiam ngai loh an thiam thar a, sikul nuam an tih phah thin. He kumtharah hian thil thar engnge i hriat belh tawh? Chaw leh chawhmeh thing aiin a tharlâm chhum hminsa ei chu a tui fe zawk ti raw? Incheina thuamhnaw pawh a bal leh hlui ai chuan a fai leh tharlama incheina chuan kan nun uluk ngai a ni tih min hrilh nghal a. Thinrim leh lungawi lo hmel aiin hmel hlim leh nui hmelin mi a tihahdam thin. Pathianin a thlawnin ni leh eng min pe a, kan duh ang anga khawsa theiin hun tha min pe tel bawk a. Nitin thil thar LALPAN a pe zel che asin. Kan mize ken theuh chu kan la neih loh neih, hriat ngai loh hriat, hmuh ngai loh hmuh, chan ngai loh chan duhna a ni. Sum leh paiah Rs. 10 neiin Rs. 20 neih belh, Rs. 100 neiin Rs. 1,000; Rs. 1,000 neiin Rs.10,000 kan duh a. Kan rilru leh thinlung hi duhamnain a luahkhat thin. Rualawhna leh rual elnain mitin min chim a. Tan lain theihtawp chhuahin kan intlansiak nasa a, kan hlawhtling thawkhat viau a, a lawmawm a ni. Hlawhtlinna leh vanneihna min petu Lalpa tan kan hun, kan taksa, kan thiamna tharlam tha tha te hi i pe ve ang u. Hnahhlui tilin hnah thar a chhuah angin rawngbawltu thar tha tha te hian a tam thei ang berin Lalpa tan thil tha ti turin i inbuatsaih ang u. Kum hlui, kan nun hluia kan thiltih sual leh tha lote tlansanin “Thil tha ti tura min siamtu Lalpa tan thil tha tih i tum ang u. A tha lam duh leh ti tura nun inthlakthleng (change) hi Lalpa duhzawng a ni si a.” Chu thil tha tih chu kan awmna tura Lalpa lo buatsaih lawk a ni si a.