Chaltlang KTP

 Sadraka te, Mesaka te, Abednagoa te chuan lal chu an chhang a, a hnênah, “Aw Nebukadnezzar, he thu ah hian kan chhân che pawh a ngai lo ve. Kan Pathian, a rawng kan bâwl thina chuan rawhtuina meipui ata min chhanchhuak thei si a, i kut ata pawh, aw lalber, min chhanchhuak mai ang. Chuti lo pawh ni sela, aw lalber, i pathian rawng chu kan bâwl dâwn lo va, I rangkachak milim din pawh chu chibai kan bûk hek lo vang, tih hi hria ang che,’’ an ti a. (Daniela 3:17-19)

“I RANGKACHAK MILIM DIN PAWH CHU CHIBAI

KAN BUK HEK LOVANG,”(Dan.3:18(d))

“Kei chu Kristian ka ni a,”Muanpuii Saiawi.

– V.L. Ngheta Airawn

                  A chunga thu ka han tarlan hi Kristiante chuan kan hrethiam nghal vek mai awm e. Chutih rual erawh chuan tlem han thai zui ve chakna ka neih deuh vangin ka han thai thui deuh teh ang. Daniela leh a thian ten Nebukaa Nezara rangkachak milim chibai an buk ve duh loh thu leh chumi kal zelah chuan Pathian chhanchhuahna lo lang nghal mai lem lovin, Sakeibaknei pukah paihluh leh Meipui nanem lo a sa a paihluhte an luh chilh leh te te a nih kha. Daniela leh a thiante Pathian biak hi tuna kan Pathian biak tho hi a ni tih kan hriat pawh a va tul thar kher ve le. Anni thianho kha chuan Meipui leh Sakeibaknei puk paihluh kha an hlauh phah hauh lova, hremna rapthlak tak hmachhawn tur tih inhre reng chungin Milim/Milem mai mai hmaah an kun duh hauh chuang lo. Han kun zeuh sela; an nunna a him anga, chumai ni lovin lal Nebuka Nezara an tilawm ni mai tur; chubakah lal chawimawina No pui pawh an dawm ngei ang le. Chung thil mai mai chuan an thianho chu intihhnawk an tum hauh lo a, an Pathian phatsan pawh an tum hek lo; an Pathian phatsan pai chuan Sa hlauhawm pawhin ei ral vek mahse, Meipui pawhin kangral vek mahse pawi an ti hauh lo! A chunga thu pakhat ka han tarlan tel hi kan Mizo nula tawngkam chhuak tawhah chuan a mawi ka la tih ber a ni hial awm e. “Kei chu kristian ka ni a,” a tih chhan chu a hnathawhna hmun Korea ramah India tana palai hna a thawk tih kan hriat hlawm kha. Chumi hmun ngeiah chuan Pu Tijendra Khanna, L.G Deli a zin tumin ram pahnihte inkungkaihna a lo that zawk nan te pawh a ni hial ta ve ang, Budhist Temple-ah chuan an milem pathian hmaah an lutho dawn ta a; mahse kan mizo nula huaisen tak chu a lut ve ta hauh lo mai a, a bula mi ten, “Engngati nge i luh ve loh?” an tih chuan he tawngkam mawi tak hian, “Kei chu kristian ka nia,” tiin a luh ve loh chhan a puangngam ngat a ni. A va ropui em. Budhist te nen Conference an nei a, Puithiamte nen Temple luh a tul si a, mahse kristian a ni tih a inhriatna chuan milem pathian hmunah chuan a luh tir lo thei ngat nia mawle. Keini ho hi chu hna chu chelhin, chu hmunah ngei chuan mawhphurhna pawimawh chang ve ta ila, ani ang hian kan huaisen tawk meuh na maw chu le. Kan Politician ho te hnuhma nitin chanchin bu a kan hmuh thin te min ngaihtuah tir lo thei lo a, milem pathian biakna atana hman thin Coconut sawhkeh emaw Chal nawihsen ve tak mai pawh an hreh em loh dan te hriat chuan he nula rothap lo tak, Krista tana nun huaisen tak nei lawi si hi a entawn tlak hle mai. Daniela te thianho ropuina chu milem hmaah an kun duh lo kha a ni a. Tin, he nula pawh hi Isua ringtu anih vanga milem pathian pukah a luh duh lohna tak hi a ropuina a va ni em. Hawh u, keiniho hi i en enfiah ngam ve teh ang u khai. Milem biain kan tal buai ta hial em le.